Պատմությունը 
Ընկերությունը հիմնադրվել է 1997թ. հեմոֆիլիայով հիվանդների ծնողների և հիվանդների կողմից՝ Հեմոֆիլիայի կենտրոն ստեղծելու, հիվանդներին ու նրանց հարազատներին բժշկական, սոցիալական և հոգեբանական աջակցություն ցուցաբերելու նպատակով: 1998թ. Ասոցիացիան դարձավ Հեմոֆիլիայի համաշխարհային ֆեդերացիայի լիիրավ անդամ: Նույն թվականին այն դարձավ եվրոպական կոնսորցիումի անդամ, 2001թ. ի վեր այն Անդրկովկասյան դաշինքի հիմնադիրն է: Ինչպես բոլոր զարգացող երկրներում Հեմոֆիլիայի համաշխարհային ֆեդերացիան (ՀՀՖ) Հայաստանում իրականացրեց հեմոֆիլիայով հիվանդների բուժման ծրագիր՝ GAP: Այս ծրագրի շրջանակներում ստորագրվեց հուշագիր ՀՀՖ և ՀՀ կառավարության միջև: ՀՀՖ-ն և ՀՀ առողջապահության նախարարությունն իրականացրեցին հեմոֆիլիայի բուժման ազգային ծրագիրը:

Մեր աշխատանքները 
Հեմոֆիլիայի հայկական ասոցիացիան միակ հասարակական կազմակերպությունն է, որը ներկայացնում և պաշտպանում է Հայաստանում հեմոֆիլիա ունեցողների շահերը:
Բացի հեմոֆիլիայի բուժումից, կենտրոնի նպատակն է հեմոֆիլիկներին միավորել մեկ ընտանիքում, որը հնարավորություն է տալիս միմյանց հետ շփվել, խորհրդակցել, մտքեր և առաջարկներ փոխանակել կենտրոնում աշխատանքն ավելի լավ կազմակերպելու համար: Կենտրոնում իրականացվում է գիտական և կրթական նյութերի թարգմանություն, որոնք բաժանվում են հիվանդներին, բժիշկներին և ծնողներին: Հայաստանում հայտնաբերվել և գրանցվել են 216 հիվանդներ: Մենք լուսաբանման աշխատանքներ ենք իրականացնում նոր հիվանդների և նրանց ծնողների շրջանում՝ հիվանդության խնամքի և բուժման համար: Հեմոֆիլիայով հիվանդների բուժման, կանխարգելման և ախտորոշման հիմնական և միակ կենտրոնը Ռ.Օ. Յոլյանի անվան արյունաբանական կենտրոնն է Երևանում: 

Մեր խնդիրը
Ասոցիացիայի առաջնային խնդիրն է տարածել տեղեկություններ և կազմակերպել ուսուցման ծրագրեր Հայաստանի տարբեր մարզերում: Մեր ասոցիացիայի հեռահար ծրագրերից են այցելությունները նոր մարզեր, աշխատանքը այդ մարզերի բուժանձնակազմի և հիվանդների հետ:
  • Հատկապես կարևոր է նոր մարզային կենտրոնի ստեղծումը՝ հաշվի առնելով հեմոֆիլիայով հիվանդների քանակն ու հարևան մարզերի հետ շփվելու հնարավորությունը.
  • Կարծում ենք, որ նպատակահարմար է կենտրոնների ստեղծումը Լոռու և Շիրակի մարզերում և յուրաքանչյուր մարզում արյունաբանության մեկ մասնագետի վերապատրաստումը.
  • Ավելի մեծ թվով կամավորների ներգրավումը.
  • Հեմոֆիլիայով հիվանդներից ընտրել և վերապատրաստել նոր մասնագետներ և ներգրավել նրանց ասոցիացիայի աշխատանքներում, որպեսզի երկարաժամկետ հեռանկարում նրանք ներգրավվեն կառավարման խորհրդի աշխատանքներում:
     
Մեր Ասոցիացիան Թվինինգ ծրագիր է իրականացնում Մեծ Բրիտանիայի հեմոֆիլիայի ասոցիացիայի հետ: 2 տարին մեկ մասնակցում ենք Հեմոֆիլիայի համաշխարհային ֆեդերացիայի կողմից կազմակերպվող միջազգային համագումարներին և ամենամյա գիտաժողովներին: Պատվիրակությունը բաղկացած է լինում Ասոցիացիայի ղեկավար կազմից, ինստիտուտի վարչակազմից, բժիշկներից, հիվանդներից և նրանց ծնողներից: